Anëtari i koalicionit VLEN në degën e Sarajit, Arsim Rustemi, ka reaguar ashpër ndaj mungesës së ujit në fshatin Arnaqi, duke akuzuar institucionet për neglizhencë dhe mosveprim.
“Sa e rëndë është heshtja kur uji mungon, e edhe më e rëndë kur mungon përgjegjësia”, shkruan Rustemi, duke ngritur zërin për gjendjen alarmante në këtë vendbanim që, sipas tij, po “thahet në etje, jo nga qielli, por nga neglizhenca e institucioneve”.
Ai thekson se është koha që Komuna e Sarajit të kërkojë përgjegjësi nga Qyteti i Shkupit për këtë situatë dhe shton me vendosmëri: “Nëse nuk guxojnë të kërkojnë përgjigje, le t’ua themi ne: ujin mund ta ndalni, por zërin e këtij fshati jo!”
Rustemi paralajmëron se nëse institucionet vendore zgjedhin të heshtin, banorët dhe përfaqësuesit e VLEN nuk do të heshtin.
“Arnaqia s’mund të shuhet në heshtje, sepse këtu rritet drita dhe qëndresa”, përfundon ai.