Deputeti i koalicionit VLEN, Adnan Azizi përmes një reagimi në “Facebook”, i ka reaguar kreut të ASH-së, Arben Taravari lidhur me “servilizmin”.
Sipas Azizit, rezili të bën rezil, kurse servili servil.
Duke shprehur respekt për aktivistët e ASH-së Azizi thotë se nuk ka pasur njeri që i është servilosur më shumë kryeministrit.
Kujton se çdo fjalë e Taravarit ishte lavd për Mickoskin nga “raporte të shkëlqyera”.
Reagimi i plotë:
Rezili të bën rezil, servili të bën servil! Nuk ka pasur njeri që i është servilosur më shumë kryeministrit! Çdo fjalë që nxirrte ishte lavd për Mickoskin nga “raporte të shkëlqyera” deri te deklarata se “70% e qytetarëve janë të kënaqur me Mickovskin”!
Mendoi se me këso servilizmi do të mbetej edhe në Qeveri edhe me BDI. Por kur s’i dolën hesapet, u kthye prapa dhe nisi të predikojë moral! Hipokrizi që të vjell shpirtin!
Politika bëri njërit me një sy, e tjetrit “ti je më i miri” nuk pi ujë! Do edhe në Qeveri, edhe me VLEN, edhe t’i bësh temena Aliut?! Nuk shkon! Siç thotë populli, me një dorë s’mbahen tre bostana!
Respekt pa kufi për aktivistët e ASH-së!
Për 22 vite qëndruat besnikë dhe stoikë kundër BDI-së. Nuk ka asnjë dyshim se një meritë të jashtëzakonshme për ndryshimin e sotëm e kanë aktivistët e VLEN-it, por po aq të vlerësuar janë edhe ata të ASH-së që me dekada nuk e kanë ndalur kurrë luftën kundër krimit, korrupsionit….
Ju bashkë me VLEN-in sollët rotacionin dhe i hapët rrugë ndryshimit politik!
Sa herë që kryetari devijoi nga rruga, sa herë që ndryshoi qasje, ju aktivistë nuk heshtët!
I thatë qartë “Ti ec në rrugën tënde, ne nuk bëhemi bashkë me BDI-në në asnjë rrethanë!”
Ndaj sot, me zemër të hapur dhe bindje të thellë, u bëj thirrje të gjithë aktivistëve të ndershëm dhe të sinqertë. Eja ta ndajmë bashkë këtë meritë dhe ta çojmë përpara betejën që e nisëm bashkë!